قطر کے شہر دوحہ کے عبداللہ بن خلیفہ اسٹیڈیم میں کھیلے گئے ایشین فٹبال کپ کے گروپ سی کے آخری اور اہم میچ میں فلسطین نے ہانگ کانگ کو تین صفر سے ہرادیا۔
اس سے قبل فلسطین نے گروپ مقابلے میں یو اے ای سے میچ 1-1سے برابر کیا تھا جب کہ ایران کے ہاتھوں اسے 1-4 سے شکست ہوئی تھی۔یاد رہے کہ ایشین فٹبال کپ میں یہ فلسطین کی پہلی فتح ہے اور اس تاریخی جیت کی بدولت فلسطین نے ناک آٹ مرحلے کے لیے کوالیفائی کرلیا ہے جہاں 16ایشیائی ٹیمیں مدمقابل ہوں گی۔فلسطین اس سے قبل 2 مرتبہ ایشین فٹبال کپ کھیل چکا ہے لیکن وہ کوئی بھی میچ جیتنے میں کامیاب نہیں ہو سکا تھا۔
یاد رہے کہ قطر میں ایشین فٹبال کپ ایسے موقعے پر ہو رہا ہے جب غزہ پر اسرائیلی حملے جاری ہیں اور اسرائیلی جارحیت سے متاثرہ فلسطینیوں کے لیے فٹبال ٹیم نے خوشی کا ایک موقع فراہم کیا ہے۔
