تحریک انصاف کی آزاد کشمیر میں مزید دو وکٹیں گر گئیں، قانون ساز اسمبلی کے مزید دو اہم اراکین نے پیپلز پارٹی میں شمولیت کا اعلان کردیا ۔
کراچی میں پی پی پی شعبہ خواتین کی مرکزی صدر و رکن سندھ اسمبلی فریال تالپور سے سیاسی رہنماؤں کی ملاقاتیں ہوئیں جس میں انہوں نے پیپلز پارٹی میں شمولیت کا اعلان کر دیا ۔
فریال تالپور سے پی ٹی آئی آزاد کشمیر کے سینئر نائب صدر و ایم ایل اے چودھری رفیق نیئر اور وزیر ٹرانسپورٹ جاوید بٹ کی ملاقات ہوئی ۔
ملاقات کے دوران چودھری رفیق نیئر اور جاوید بٹ نے اپنے اپنے ساتھیوں اور حامیوں سمیت پیپلز پارٹی میں شمولیت کا اعلان کیا ۔
اس موقع پر چودھری رفیق نیئر اور جاوید بٹ نے آصف علی زرداری اور چیئرمین بلاول بھٹو کی قیادت پر مکمل اعتماد کا اظہار کیا ۔
سردار تنویر الیاس نے کہا کہ کشمیر کاز کو مضبوطی سے آگے بڑھانے اور آزاد کشمیر کی ترقی و بہبود کا واحد سیاسی پلیٹ فارم قائدِ عوام شہید بھٹو اور شہید محترمہ بینظیر بھٹو کی پارٹی ہے، اس کی قیادت اب بلاول بھٹو کے مضبوط ہاتھوں میں ہے ۔
