اسلام آباد کی انسداد دہشتگردی عدالت نے تھانہ آئی نائن مقدمہ میں وزیراعلیٰ خیبرپختونخواہ علی امین گنڈا پور کو اشتہاری قرار دیدیا۔ جج طاہر عباس سپرا نے تحریری فیصلے میں کہا ہے کہ تمام غیر حاضر ملزمان کی حاضری معافی کی درخواست مسترد کی جاتی ہے۔ حکم نامے میں کہا گیا کہ علی امین گنڈا پور کو اشتہاری قرار دینے کے بعد کیس کو دیگر ملزمان سے الگ کر دیا گیا۔
عدالت کی جانب سے تحریری فیصلے میں کہا گیا کہ دوران سماعت ملزمان راجا راشد حفیظ، واثق قیوم، راجا خرم نواز، فیصل جاوید، عمر تنویر کے ناقابل ضمانت وارنٹ گرفتاری جاری کئے گئے جب کہ تمام غیر حاضر ملزمان کے وکلا سردار مصروف، مرتضی طوری، زاہد بشیر ڈار نے حاضری سے استثنی کی درخواست دائر کی۔
تحریری فیصلے میں کہا گیا کہ تمام غیر حاضر ملزمان کی حاضری معافی کی درخواست مسترد کی جاتی ہے اور ان کے ضمانتی مچلکے منسوخ کئے جاتے ہیں۔ کیس کی مزید سماعت 28 نومبر تک ملتوی کردی گئی ہے۔ خیال رہے کہ گزشتہ روز وزیراعلیٰ خیبرپختونخواہ علی امین گنڈاپور طلبی کے باوجود علی امین پیش نہیں ہوئے تھے۔
