شعبہ ایکسائز اسلام آباد نے غیر رجسٹرڈ، غیر نمونہ نمبر پلیٹس اور کالے شیشے والی گاڑیوں کیخلاف سخت کارروائی کا آغاز کر دیا ہے۔ سخت ترین کریک ڈاؤن میں گاڑی مالکان پر بھاری جرمانے کیے جائیں گے.
ایکسائز ڈپارٹمنٹ کی جانب سے ہزار سی سی گاڑی کو 5 ہزار، ہزار سے دو ہزار سی سی گاڑی کو 10 ہزار روپے اور 2 ہزار سی سی سے اوپر کی گاڑیوں کو 20 ہزار روپے تک جرمانہ کیا جا رہا ہے۔ اس حوالے سے ڈائریکٹر ایکسائز بلال اعظم کا کہنا ہے کہ کوئی سفارش یا دباؤ قبول نہیں کیا جا رہا، جرمانے کی ادائیگی تک گاڑیوں کی رجسٹریشن کینسل کی جا رہی ہے۔
ڈائریکٹر ایکسائز بلال اعظم نے مزید کہا کہ چیف کمشنر کے نوٹیفکیشن کے مطابق اگر دوسری بار قانون کی خلاف ورزی کی گئی تو جرمانہ پانچ گنا زیادہ ہو گا۔
