ایبٹ آباد میں پیش آنے والے افسوسناک حادثے نے علاقے کو سوگوار کر دیا۔ لیڈی گارڈن کے قریب ایک تیز رفتار ڈمپر نے اسکول کے بچوں کو روند ڈالا، جس کے نتیجے میں تین ننھے طالب علم موقع پر ہی دم توڑ گئے۔
ابتدائی اطلاعات کے مطابق جاں بحق ہونے والوں میں دو بچے اور ایک بچی شامل ہے، جب کہ پانچ بچے شدید زخمی ہوئے ہیں۔ عینی شاہدین کے مطابق حادثہ اس وقت پیش آیا جب کنٹونمنٹ بورڈ اسکول کے طلبہ ایف بی آر آفس کے ساتھ والی سڑک عبور کر رہے تھے۔ اسی دوران ڈمپر بے قابو ہو کر ان پر چڑھ دوڑا۔
حادثے کی اطلاع ملتے ہی ریسکیو اور میڈیکل ٹیمیں جائے وقوعہ پر پہنچ گئیں۔ ریسکیو 1122 کے عملے نے جاں بحق بچوں کی لاشوں اور زخمی طلبہ کو فوری طور پر ڈی ایچ کیو اسپتال منتقل کیا۔
