بھارت کے شہر لکھنؤ میں آن لائن اسمارٹ فون منگوانے والے افراد نے ڈیلیوری بوائے سے فون لینے کے بعد اس کا گلا گھونٹ کر قتل کر دیا ـ
غیر ملکی خبررساں ادارے کی رپورٹ کے مطابق ، بھارت کے شہر لکھنؤ میں 23 ستمبر کے روز 30سالہ ڈیلیوری بوائے بھرت پرجاپتی کو اسمارٹ فون ڈیلیوری کے دوران قتل کیا گیا تھا۔
رپورٹ کے مطابق ،ملزم ہمانشو نے کیش آن ڈیلیوری پر انڈین آن لائن ایپ کے ذریعے اسمارٹ فون آرڈر کیا تھا۔ جس کو ڈیلیوری بوائے بھرت نے ہمانشو کے گھر ڈیلیور کیا تھا،
غیر ملکی خبر رساں ادارے کی رپورٹ کے مطابق ،جب بھرت ہمانشو کے گھر اسمارٹ فون کا آرڈر لے کر پہنچا تو وہاں 2 اور لوگ بھی موجود تھے ،جنہوں نے بھرت سے اسمارٹ فون لے کر اسے گلا گھونٹ کر مارڈالا اور پھر اس کی لاش نہر میں پھینک دی۔
رپورٹ کے مطابق پولیس کا کہنا ہےکہ جب بھرت 2روز تک گھر واپس نہ پہنچا تو اس کے بعد اس کے والدین نے پولیس میں ایف آئی آر درج کروائی ـ جس کے بعد پولیس نے تفتیش کا آغاز کیا اور پھر بھرت کا نمبر ٹریس کیا گیا جس کے ذریعے ہمانشو کے گھر کا پتا لگاتے ہوئے 2 ملزمان کو گرفتار کرلیا۔
دوران تفتیش ہمانشو اور اس کے ساتھی نے بھرت کے قتل کا اعتراف کرلیا جب کہ ملزمان کا ایک ساتھی فرار ہے۔
