ملک کے بیشتر علاقوں میں خون جمادینے والی یخ بستہ ہواؤں کا راج۔بالائی علاقوں میں بارش اور برفباری جبکہ میدانی علاقے دھندکی لپیٹ میں ہیں
ملک میں خون جمادینے والی کڑاکے کی سردی کا راج ہے۔میدانی علاقے دھند کی لپیٹ میں جبکہ بالائی علاقوں نے سفیدی کی چادر اوڑھ لی۔ملک میں موسم سرما کے رنگ نظر آنے لگے۔ کہیں بارش اور کہیں برف باری سے سردی کی شدت میں مزید اضافہ ہوگیا۔بالائی علاقوں میں پہاڑوں پر برفباری کے حسین مناظر سے مقامی لوگ اور سیاح خوب لطف اندوز ہو رہے ہیں۔
کشمیرکے بعض علاقوں میں درجہ حرارت نقطہ انجماد سے گرنے کے باعث ندی نالے اور چشمے جم گئے۔ شدید سردی کی وجہ سے سیاحوں کی آمدورفت بند ہوگئی۔سیاحت سے جڑے لوگوں کے کاروبار بھی ٹھپ ہو کر رہ گئے۔ خشک سردی کے باعث بیماریاں پھوٹنے کے خطرات بھی منڈلانے لگے ہیں۔پنجاب اور سندھ میں دھندکے ڈھیرے ہیں۔متعدد ٹرینیں اور پروازیں تاخیر کا شکار جبکہ کئی کو منسوخ کردیا گیا۔محکمہ موسمیات کا کہنا ہے کہ ملک کے بیشتراضلاع میں آئندہ کچھ روز تک موسم خشک اور سرد رہے۔
