اسلام آباد: پاکستان کی وفاقی وزیرِ آئی ٹی شزہ فاطمہ خواجہ نے عالمی سطح پر ایک اور اعزاز اپنے نام کر لیا۔
انہیں فاسٹ موڈ ایوارڈز 2026 میں ’’انڈسٹری چیمپئن آف دی ایئر‘‘ کے اعزاز سے نوازا گیا ہے۔
یہ ایوارڈ دنیا بھر سے ہر سال صرف ایک رہنما کو دیا جاتا ہے اور فاسٹ موڈ ایوارڈز کا سب سے بڑا انفرادی اعزاز ہے۔
یہ اعزاز 60 سے زائد ممالک کی 500 سے زیادہ کمپنیوں کے درمیان مقابلے میں پاکستان کو حاصل ہوا۔
شزہ فاطمہ خواجہ کی قیادت میں پاکستان کی آئی ٹی اور آئی ٹی ای ایس برآمدات مالی سال 2025-26 میں ریکارڈ چار اعشاریہ چھ ارب ڈالر تک پہنچ گئیں۔
آئی ٹی سیکٹر نے تین اعشاریہ نو ارب ڈالر کا تاریخی تجارتی سرپلس حاصل کیا۔
پاکستانی فری لانسرز کی برآمدی آمدنی بھی ایک ارب 76 کروڑ ڈالر کی بلند ترین سطح پر پہنچ گئی۔
رواں سال پاکستان میں 5G اور این جی ایم ایس اسپیکٹرم کی تاریخی نیلامی مکمل ہوئی۔
ڈیجی سکلز پروگرام کے تحت 45 لاکھ سے زائد نوجوانوں کو مفت ڈیجیٹل تربیت فراہم کی جا چکی ہے۔
گوگل کی پاکستان میں باضابطہ رجسٹریشن، کروم بکس کی مقامی اسمبلی اور ڈیجیٹل ترقی کے عالمی اشاریے میں 27 درجے بہتری بھی اہم پیش رفت ہے۔
یہ عالمی اعزاز پاکستان کی آئی ٹی انڈسٹری اور ڈیجیٹل ترقی کے لیے ایک اہم سنگ میل قرار دیا جا رہا ہے۔
