کوہاٹ کے علاقے شکر درہ روڈ پر سی ٹی ڈی نے خفیہ اطلاع پر کامیاب کارروائی کرتے ہوئے تین دہشتگردوں کو ہلاک کر دیا۔ کارروائی کے دوران دہشتگردوں اور سی ٹی ڈی اہلکاروں کے درمیان طویل فائرنگ کا تبادلہ ہوا۔ سی ٹی ڈی حکام کے مطابق ہلاک ہونے والے دہشتگردوں کی شناخت کا عمل جاری ہے جبکہ ان کے قبضے سے تین کلاشنکوف اور نو میگزین برآمد کیے گئے ہیں۔
دوسری جانب شبقدر میں بھی سی ٹی ڈی نے ناکہ بندی کے دوران فتنہ الخوارج سے تعلق رکھنے والے تین دہشتگردوں کو ہلاک کیا۔ کارروائی خفیہ اطلاع پر کی گئی جس میں دہشتگردوں کی جانب سے فائرنگ کا آغاز ہوا، جس کے جواب میں سی ٹی ڈی اہلکاروں نے مؤثر کارروائی کی۔
سی ٹی ڈی کے مطابق ہلاک دہشتگردوں کے قبضے سے اسلحہ، نقد رقم اور دیگر سامان بھی برآمد ہوا ہے جبکہ ان کے کچھ ساتھی فرار ہونے میں کامیاب ہوگئے۔ فرار دہشتگردوں کی گرفتاری کے لیے سرچ آپریشن جاری ہے اور تھانہ مردان میں مقدمہ درج کر کے مزید قانونی کارروائی شروع کر دی گئی ہے۔
سی ٹی ڈی حکام کا کہنا ہے کہ یہ کارروائی انٹیلی جنس بیسڈ آپریشن کے تحت کی گئی جس کی کامیابی پر آئی جی پولیس ذوالفقار حمید اور ایڈیشنل آئی جی سی ٹی ڈی جواد قمر نے ٹیم کی کارکردگی کو سراہا۔ انہوں نے کہا کہ صوبے بھر میں دہشتگردی کے خلاف انٹیلی جنس بیسڈ آپریشنز تسلسل کے ساتھ جاری ہیں۔
