خیبرپختونخوا حکومت نے صوبائی بجٹ 15 جون کو پیش کرنے کا فیصلہ کر لیا ہے، جس کے لیے صوبائی اسمبلی کا اجلاس بھی طلب کر لیا گیا ہے۔ ذرائع کے مطابق بجٹ پیش کرنے کی تمام تیاریاں مکمل کر لی گئی ہیں اور 15 جون کو بجٹ صوبائی اسمبلی میں پیش کیا جائے گا۔
اطلاعات کے مطابق صوبائی حکومت نے بانی چیئرمین سے مشاورت کے بغیر بجٹ پیش کرنے کا فیصلہ کیا ہے۔ بجٹ اجلاس کے شیڈول کے تحت 16 اور 17 جون کو وقفہ ہوگا، جبکہ 18 جون سے بجٹ پر باقاعدہ بحث کا آغاز کیا جائے گا۔ صوبائی حکومت نے اپنی اس فیصلے سے صوبائی اسمبلی سیکریٹریٹ کو بھی آگاہ کر دیا ہے۔
ذرائع کا کہنا ہے کہ بجٹ اجلاس 30 جون تک جاری رہے گا۔ اس دوران بعض پارٹی رہنماؤں اور ناراض اراکین کی جانب سے یہ مؤقف سامنے آیا کہ بجٹ پیش کرنے سے قبل بانی چیئرمین سے مشاورت کی جانی چاہیے۔
دوسری جانب وزیراعلیٰ کو بانی چیئرمین سے ملاقات اور مشاورت کی اجازت تاحال نہیں مل سکی، حالانکہ اس مقصد کے لیے اسلام آباد ہائی کورٹ میں ایک درخواست بھی دائر کی گئی تھی۔ تاہم صوبائی حکومت نے مقررہ تاریخ پر بجٹ پیش کرنے کا فیصلہ برقرار رکھا ہے۔
