خیبر پختونخوا کے ضلع لکی مروت میں اغوا کیے گئے جیل پولیس اہلکار صدیق خان کی لاش احمد خیل کے قریب سے برآمد کر لی گئی ہے، جبکہ منجی والا علاقے سے دو نامعلوم نوجوانوں کی لاشیں بھی ملی ہیں۔
پولیس کے مطابق صدیق خان کو گزشتہ روز احمد خیل اڈہ کے قریب نامعلوم مسلح افراد نے اغوا کیا تھا، جنہیں بعد ازاں بے دردی سے قتل کر دیا گیا۔ پولیس کا کہنا ہے کہ صدیق خان کرک جیل میں تعینات تھے اور چھٹی پر اپنے گھر آئے ہوئے تھے۔
واضح رہے کہ اسی علاقے سے دو روز قبل اینٹی نارکوٹکس فورس کے ایک اہلکار کو بھی اغوا کے بعد شہید کر دیا گیا تھا، جس سے علاقے میں سیکیورٹی صورتحال پر تشویش بڑھ گئی ہے۔
ادھر منجی والا سے دو نوجوانوں کی لاشیں بھی ملی ہیں، جنہیں نامعلوم افراد نے رات کے وقت فائرنگ کر کے قتل کیا۔ پولیس نے لاشوں کو اپنی تحویل میں لے کر سٹی ہسپتال لکی مروت منتقل کر دیا ہے۔ حکام کے مطابق تاحال دونوں افراد کی شناخت نہیں ہو سکی۔
