لاہور: رفاہ انٹرنیشنل یونیورسٹی کے گلبرگ کیمپس میں اس کے فلیگ شپ ایونٹ انوویشن اینڈ ویلنَس فیسٹول 2026 کا باقاعدہ آغاز کر دیا گیا ہے۔ سات روزہ کثیر الجہتی فیسٹیول تعلیم، صنعت اور کمیونٹی کے درمیان اشتراک کو فروغ دینے کے ساتھ ساتھ صحتِ عامہ اور نوجوانوں کی کاروباری صلاحیتوں کے فروغ پر مرکوز ہے۔
یہ فیسٹیول رفاہ انٹرنیشنل یونیورسٹی لاہور کے ریجنل ڈائریکٹر محمد عمر فاروق کی قیادت میں منعقد کیا جا رہا ہے، جس کا مقصد طلبہ، اساتذہ، صنعت سے وابستہ ماہرین، ہیلتھ کیئر پروفیشنلز اور کمیونٹی تنظیموں کو ایک پلیٹ فارم پر یکجا کر کے تعلیم کو عملی میدان اور جدت کو سماجی اثر میں تبدیل کرنا ہے۔
فیسٹیول کا افتتاح ڈی جی این سی ایچ ڈی علی اصغر اور چانسلر رفاہ انٹرنیشنل یونیورسٹی حسن محمد خان نے کیا۔
چانسلر رفاہ انٹرنیشنل یونیورسٹی حسن محمد خان کا کہنا تھا کہ انوویشن اینڈ ویلنَس فیسٹیول تعلیم کو عملی میدان سے جوڑنے کی ایک سنجیدہ کوشش ہے، رفاہ یونیورسٹی نوجوانوں کو محض طالبعلم نہیں، مسئلہ حل کرنے والا لیڈر بنا رہی ہے، کیونکہ ہمارا ماننا ہے کہ جامعات کا کردار صرف ڈگریاں دینا نہیں بلکہ معاشرے کو سمت دینا ہے، تعلیم، صحت اور صنعت کا باہمی ربط ہی پائیدار قومی ترقی کی بنیاد ہے، ہماری ترجیح علم کو سماجی اثر اور عوامی فلاح میں تبدیل کرنا ہے،۔جامعات کو کمیونٹی انگیجمنٹ کے ذریعے عوامی خدمت کا مرکز بننا ہوگا۔رفاہ انٹرنیشنل یونیورسٹی اخلاقی قیادت اور سماجی ذمہ داری پر یقین رکھتی ہے۔ورک ولیج نوجوانوں، اسٹارٹ اپس اور فری لانسرز کے لیے ایک نیا موقع ہے۔صحت عامہ کی سہولیات کو کیمپس سے باہر عوام تک پہنچانا ہمارا عزم ہے۔رفاہ تعلیم، صحت اور جدت کے ذریعے قومی ترقی میں فعال شراکت دار بن چکی ہے۔ اس موقع پر شریک دیگر مقررین نے اس بات پر زور دیا کہ جامعات کو عملی تعلیم، اخلاقی قیادت اور کمیونٹی انگیجمنٹ کے ذریعے قومی ترقی میں فعال کردار ادا کرنا چاہیے۔
فیسٹیول کی ایک نمایاں خصوصیت اس کا مضبوط عوامی فلاحی پہلو ہے، جس کے تحت چغتائی لیب، الخدمت فاؤنڈیشن اور الخدمت موبائل ڈسپنسری کے اشتراک سے مفت میڈیکل کیمپس، تشخیصی سہولیات، غذائی مشاورت اور فزیوتھراپی اسیسمنٹس کا اہتمام کیا گیا ہے۔ ان اقدامات کا مقصد صحت کی سہولیات کو کیمپس سے باہر قریبی آبادیوں تک پہنچانا ہے۔
ہفتہ بھر جاری رہنے والے اس فیسٹ میں اسپورٹس ویک، کلچرل ڈے، انٹر یونیورسٹی مقابلے، اسٹارٹ اپ بازار، جاب فیئر، سی ای اوز ڈنر، ایلومنائی و انڈسٹری راؤنڈ ٹیبلز اور عوامی آگاہی سیمینارز شامل ہیں، جبکہ مرد و خواتین طلبہ کے لیے علیحدہ سرگرمیوں کا بھی اہتمام کیا گیا ہے۔ بچوں کے لیے لرننگ زون اور طلبہ کی تخلیقی نمائشیں جن میں خوراک، دستکاری، جیولری اور کاروباری مصنوعات شامل ہیں ، فیسٹیول کی جامع نوعیت کو مزید اجاگر کرتی ہیں۔
اس موقع پر “ورک ولیج” کا بھی افتتاح کیا گیا، جو ایک نیا بزنس اور انوویشن یونٹ ہے اور اسٹارٹ اپس، فری لانسرز اور طلبہ کاروباری افراد کی معاونت کے لیے قائم کیا گیا ہے۔
ویلنَس فیسٹول میں ملکی سطح کی ممتاز شخصیات، ماہرینِ تعلیم، ہیلتھ کیئر پروفیشنلز اور میڈیا نمائندگان شریک ہو رہے ہیں، جن میں ڈاکٹر جاوید اکرم، قاسم علی شاہ، سارہ چوہدری، نگہت ہاشمی، مغیرہ لقمان، فریحہ زیشان سمیت دیگر معروف نام شامل ہیں۔ جمعرات، 22 جنوری 2026 کو سینئر سرکاری افسران، صنعت کے رہنماؤں اور ترقیاتی شعبے کے نمائندگان کے خطابات بھی ہوں گے۔
اس اقدام کے ذریعے رفاہ انٹرنیشنل یونیورسٹی نے پائیدار صحت، صنعت سے ہم آہنگ تعلیم اور ہمہ گیر سماجی ترقی کے اپنے عزم کا اعادہ کیا ہے، اور جامعات کو محض تدریسی اداروں کے بجائے قومی فلاح و بہبود کے فعال شراکت دار کے طور پر پیش کیا ہے
