مری میں ہلکی برفباری کے باعث مال روڈ، کشمیر پوائنٹ اور بٹڑیان نے برف کی سفید چادر اوڑھ لی، جس سے سردی میں مزید اضافہ ہو گیا۔
برفباری کے باوجود مری میں ٹریفک مکمل طور پر رواں دواں رہی۔ ڈی پی او مری کی براہِ راست نگرانی میں داخلی اور خارجی راستوں پر سخت کنٹرول برقرار رکھا گیا۔
اعداد و شمار کے مطابق 5 جنوری کو 12 ہزار 777 گاڑیاں مری میں داخل ہوئیں جبکہ 8 ہزار 569 گاڑیاں شہر سے روانہ ہوئیں۔
گزشتہ 24 گھنٹوں کے دوران مجموعی طور پر 23 ہزار 114 گاڑیاں مری میں داخل ہوئیں جبکہ 15 ہزار 143 گاڑیاں واپس روانہ ہوئیں۔ اس وقت مری میں 7 ہزار 971 گاڑیاں موجود ہیں۔
ڈی پی او مری کی ہدایات پر تمام ناکہ جات مکمل طور پر فعال رہے اور سیاحوں کو بروقت رہنمائی فراہم کی گئی۔
اس موقع پر ڈی پی او مری نے کہا کہ سیاحوں کا تحفظ اور سہولت پولیس کی اولین ترجیح ہے۔ برفباری کے دوران کسی بھی قسم کے حادثے یا ایمرجنسی کی کوئی رپورٹ موصول نہیں ہوئی۔
