فیلڈ مارشل سید عاصم منیر نے کہا ہے کہ پاکستان کو کبھی دباؤ میں نہیں لایا جاسکتا، دہشت گردی کی تمام شکلوں کے خلاف کامیابی حاصل کی جائے گی ،دہشت گردی کے خلاف قوم کی جنگ کو منطقی انجام تک پہنچایا جائے گا ۔
پاک فوج کے شعبہ تعلقات عامہ کی جانب سے جاری بیان کے مطابق فیلڈ مارشل سید عاصم منیر نے کمانڈ اینڈ سٹاف کالج کوئٹہ کا دورہ کیا اور کالج کے طلبہ، افسران اور فیکلٹی سے خطاب کیا ۔
آئی ایس پی آر کے مطابق آپریشن ’بنیان مرصوص‘ کے شہدا کو خراج تحسین پیش کرکے ان کے اہل خانہ سے مکمل یکجہتی کا اظہار کرتے ہوئے آرمی چیف کا کہنا تھا کہ کہ قومی قیادت میں پاکستانی عوام مادر وطن کے دفاع کے لیے آہنی دیوار بن گئے ۔
فیلڈ مارشل عاصم منیر نے مسلح افواج کی پیشہ ورانہ مہارت کو سراہتے ہوئے اس عزم کا اعادہ کیا کہ ’معرکہ حق‘ کی کامیابی ہمارے قومی عزم اور قومی طاقت کے تمام عناصر کے درمیان مکمل ہم آہنگی کا منہ بولتا ثبوت ہے ۔
انہوں نے عالمی اور علاقائی ماحول پر تبصرہ کرتے ہوئے ابھرتے ہوئے تنازع پر روشنی ڈالی، انہوں نے پاکستان کے خلاف بلا اشتعال فوجی جارحیت کے استعمال کے لیے بھارت کے بڑھتے ہوئے رجحان کو خطرناک قرار دیا ۔
فیلڈ مارشل عاصم منیر کا کہنا تھا کہ پاکستان کو کبھی دباؤ میں نہیں لایا جاسکتا، اور دہشت گردی کے خلاف پاکستان کی کوششوں سے توجہ ہٹانے کے عزائم کو ناکام بنایا جائے گا ۔
اس موقع پر فیلڈ مارشل نے بین الاقوامی سطح پر تسلیم شدہ دیرینہ تنازع کشمیر کے پُرامن حل کی ضرورت پر زور دیا، اور بھارت کی طرف سے غیر قانونی آبی دہشت گردی کے خلاف خبردار کیا ۔
فیلڈ مارشل کا مزید کہنا تھا کہ دہشت گردی کے خلاف قوم کی جنگ کو منطقی انجام تک پہنچایا جائے گا اور دہشت گردی کی تمام شکلوں کے خلاف کامیابی حاصل کی جائے گی ۔
فیلڈ مارشل نے طلبا، افسران کو مشورہ دیا کہ وہ اپنی ذمہ داریاں پوری لگن، جذبے اور عزم کے ساتھ ادا کریں، انہوں نے اختراعی سوچ اور تحقیق کی ضرورت پر زور دیتے ہوئے کمانڈ اینڈ اسٹاف کالج کوئٹہ کو مستقبل کے فوجی لیڈروں کو تیار کرنے کے لیے سراہا ۔
