گلگت بلتستان کی تاریخ میں پہلی مرتبہ منعقد ہونے والی فرسٹ ایف سی این اے انٹر ڈسٹرکٹ جی بی فٹ بال چیمپین شپ 2025 کی شاندار اختتامی تقریب آج گلگت لالک جان سٹیڈیم میں منعقد ہوئی ۔
یہ ایونٹ اپنی نوعیت کا پہلا بڑا فٹبال ٹورنامنٹ تھا، جس میں گلگت بلتستان کے تمام اضلاع کی شرکت رہی ،چیمپئن شپ کے دوران گلگت بلتستان کے مختلف اضلاع سے شرکت کرنے والی ٹیموں نے شاندار کارکردگی کا مظاہرہ کیا ۔
شائقین کی ایک بڑی تعداد نے جوش و خروش کے ساتھ میچز دیکھے اور کھلاڑیوں کی حوصلہ افزائی کی ،فاینل میچ میں گلگت غازی کی ٹیم نے ٹیم غذر کو 2-1 کے مقابلے سے شکست دیکر چیمپئن ٹرافی اپنے نام کر لی ۔
اختتامی تقریب میں مہمانِ خصوصی کمانڈر ایف سی این اے میجر جنرل سید امتیاز حسین گیلانی نے جیتنے والی ٹیموں میں انعامات تقسیم کیے ، تقریب میں چیف سیکٹری گلگت بلتستان ابرار حسین مرزا سمیت مختلف حکومتی, سماجی، اور عسکری شخصیات نے شرکت کی، جبکہ عوام کی بڑی تعداد بھی اس یادگار لمحے کا حصہ بنی ۔
شائقین فٹبال نے گلگت بلتستان میں فٹبال کے فروغ کے لیے پاک فوج کے کردار کو سراہا۔ ان کا کہنا تھا کہ پاک فوج کی معاونت سے اس ایونٹ کا انعقاد ممکن ہوا، جس سے مقامی ٹیلنٹ کو ابھرنے کا موقع ملا اور نوجوانوں میں کھیلوں کا شوق مزید بڑھا ۔
شرکاء نے گلگت بلتستان میں کھیلوں کے فروغ کے لیے ایسے مزید مقابلوں کے انعقاد پر زور دیا، یہ ٹورنامنٹ اس بات کا ثبوت ہے کہ گلگت بلتستان میں فٹبال کا بے پناہ ٹیلنٹ موجود ہے، اور اگر ایسے پلیٹ فارمز فراہم کیے جائیں تو مقامی کھلاڑی قومی اور بین الاقوامی سطح پر ملک کا نام روشن کر سکتے ہیں ۔
