فری اینڈ فیئر الیکشن نیٹ ورک (فافن) نے قومی اسمبلی کے پہلے 100 دنوں کی کارکردگی سے متعلق رپورٹ جاری کر دی۔
فافن کی رپورٹ کے مطابق قومی اسمبلی کے پہلے 100 دنوں میں قانون سازی کا عمل سست رہا، قائمہ کمیٹیوں کی تشکیل میں تاخیر نے بھی اسمبلی کی کارکردگی کو متاثر کیا۔فافن کی رپورٹ میں کہا گیا ہے کہ سیکیورٹی خدشات کی آڑ میں شہریوں کی قومی اسمبلی کی گیلری تک رسائی پر پابندی سے بھی کارکردگی متاثر ہوئی۔
رپورٹ میں مزید کہا گیا کہ مجموعی طور پر ایوان نے 66 گھنٹے 33 منٹ پر محیط 23 اجلاس منعقد کیے۔ ایوان کے موجودہ 310 ارکان میں سے 159 (51 فیصد) نے اجلاسوں میں سرگرمی سے حصہ لیا۔ ایوان میں ارکان کی اوسط حاضری 231 رہی جس میں سب سے زیادہ 302 اور سب سے کم 176 ہے۔
یہ بھی بتایا گیا ہے کہ وزیراعظم شہباز شریف نے قومی اسمبلی کے 23 میں سے صرف دو اجلاسوں میں شرکت کی جو کہ 10 فیصد ہے۔ جبکہ ماضی میں سابق وزیراعظم نواز شریف نے 26 فیصد اور عمران خان 29 فیصد سیشنز میں شرکت کی۔رپورٹ میں بتایا گیا کہ سپیکر قومی اسمبلی سردار ایاز صادق اور ڈپٹی سپیکر نے 82 فیصد کارروائی کی صدارت کی، اپوزیشن لیڈر عمر ایوب کی ایوان میں حاضری 88 فیصد رہی جب کہ صرف 29 ارکان اسمبلی نے 100 فیصد حاضری دی۔
