ٹھٹھہ کے علاقے جھرک کے قریب قومی شاہراہ پر ڈمپر اور وین کے درمیان تصادم کے نتیجے میں کم از کم پانچ افراد جاں بحق اور متعدد زخمی ہو گئے۔
ٹرک ٹھٹھہ کے گاؤں مانک خان بہرانی سے جامشورو جا رہا تھا۔ حادثے کی اطلاع ملتے ہی ریسکیو اور پولیس موقع پر پہنچ گئی۔ ریسکیو حکام کے مطابق 4 افراد موقع پر ہی دم توڑ گئے جب کہ زخمیوں کو حیدرآباد سول اسپتال منتقل کیا گیا۔
گزشتہ ہفتے پنجاب کے ضلع رحیم یار خان میں ایک بس کے الٹنے سے تین افراد جاں بحق اور 27 زخمی ہو گئے تھے۔ریسکیو حکام کے مطابق حادثہ موٹروے ایم 5 پر اقبال آباد انٹر چینج کے قریب پیش آیا جہاں اسلام آباد سے کراچی جانے والی بس کا ٹائر پھٹنے سے الٹ گئی جس کے نتیجے میں 3 افراد موقع پر ہی جاں بحق اور 27 زخمی ہوگئے۔
