اسرائیل کی جانب سے لبنان اور غزہ میں شدید ترین حملے کیے گئے ہیں۔ جس کی وجہ سے متعدد شہادتیں ہو گئی ہیں۔
غیرملکی خبررساں اداروں کے مطابق شمالی غزہ میں جبالیہ مہاجرین کیمپ پر بمباری کی گئی ہے۔جس کے باعث 22 فلسطینی شہید ہوئے ہیں۔
رپورٹس کے مطابق عینی شاہدین کے مطابق شمالی غزہ میں کی جانے والی بمباری اس حد تک شدید تھی جس کی وجہ سے شدید زلزلہ بھی محسوس کیا گیا۔
اس کے ساتھ ہی اسرائیلی فورسز نے جنوبی لبنان میں گزشتہ دو روز کے دوران اقوام متحدہ کی امن فوج ( UNIFIL) کو بھی نشانہ بنایا۔
لبنان کی وزارت صحت کے مطابق اسرائیل کی جانب سے جمعہ کو 24 گھنٹوں کے دوران متعدد حملے کیے گئے۔جس کی وجہ سے 60 افراد جان کی بازی ہار گئے اور 168 زخمی ہوئے۔
لبنان کرائسز رسپانس کے مطابق گزشتہ 24 گھنٹوں کے دوران اسرائیل نے 57 فضائی اور شیلنگ کی جس میں سے زیادہ تر حملے جنوبی لبنان کی جانب کیے گئے۔
اس کے علاوہ عراق کے مسلح گروپ نے شمالی اسرائیل میں ڈرون حملے بھی کئے اور کہا ہےکہ شمالی اسرائیل میں اہم اہداف کو نشانہ بنایا گیا ہے جہاں گولن کی پہاڑیوں پر بھی حملے کیے گئے تاہم مسلح گروپ کی طرف سے حملوں کی تفصیلات ابھی جاری نہیں کی گئی ہیں۔
