ضلع کرم کے مختلف علاقوں میں قبائل کے درمیان مسلح تصادم کی وجہ سے 3 روز کے دوران 12 افراد جاں بحق ہوگئے جب کہ متعدد زخمی ہیں۔
پولیس حکام کے مطابق کرم کے مختلف علاقوں میں قبائل کے درمیان فائرنگ کا تبادلہ وقفے وقفے سے جاری ہے، پولیس انتظامیہ کے ساتھ مل کر حالات کو قابو کرنے کی کوشش کر رہی ہے۔
پولیس ذرائع کا کہنا یے کہ گاؤں بوشہرہ اور گاؤں احمد زئی میں لڑائی مورچوں کی تعمیر پر ہوئی، جو گاؤں بالش خیل، خار کلی، صدہ ، پیواڑ، تری منگل، بغکی، مقبل اور کنج علیزئی تک پھیل گئی۔
فریقین کی طرف سے ایک دوسرے پر راکٹ، میزائل، سمیت بھاری اسلحے سے فائرنگ کی وجہ سے پاراچنار شاہراہ ہر قسم کی آمد و رفت کیلئے بند ہے۔
تاہم جنگ بندی میں ضلعی انتظامیہ اور پولیس مکمل طورپر ناکام دکھائی دے رہی ہے۔
یاد رہے ضلع کرم میں دو ماہ قبل بھی قبائل کے درمیان مسلح تصادم ہوا تھا جس کے نتیجے میں 40 سے زیادہ افراد جاںبحق ہوگئے تھے۔
