راولپنڈی: پاک فوج کے شعبۂ تعلقات عامہ (آئی ایس پی آر) کے مطابق جنوبی وزیرستان اور ضلع دیر میں سیکیورٹی فورسز نے کامیاب انٹیلی جنس اور جوابی کارروائیوں کے دوران مجموعی طور پر 10 دہشت گرد ہلاک کر دیے۔
آئی ایس پی آر کے مطابق جنوبی وزیرستان کے علاقے اعظم ورسک میں دہشت گردوں نے سیکیورٹی فورسز کی چیک پوسٹ پر حملے کی کوشش کی، جسے بروقت اور مؤثر کارروائی کے ذریعے ناکام بنا دیا گیا۔ فائرنگ کے تبادلے میں 8 دہشت گرد مارے گئے۔
بیان میں کہا گیا ہے کہ دوسری کارروائی ضلع دیر میں کی گئی جہاں مزید 2 دہشت گرد ہلاک ہوئے۔ ہلاک دہشت گردوں کے قبضے سے اسلحہ اور گولہ بارود بھی برآمد کیا گیا۔
آئی ایس پی آر کے مطابق مارے جانے والے دہشت گرد علاقے میں دہشت گردی کی متعدد کارروائیوں میں ملوث تھے۔ بیان میں کہا گیا کہ عزمِ استحکام وژن کے تحت ملک سے دہشت گردی کے خاتمے کے لیے سیکیورٹی فورسز کی کارروائیاں جاری رہیں گی۔
