گینگسٹر لارنس بشنوئی کا نام لے کر بالی اداکار سلمان خان کو دھمکیاں دینے والے شخص کو پولیس نے گرفتار کرلیا۔
بھارتی میڈیا کے مطابق ملزم کو جمشیدپور سے گرفتار کیا گیا ہے۔ پولیس کا کہنا تھا کہ ملزم گینگسٹر لارنس بشنوئی کا نام لے کر بالی وڈ اداکار کو دھمکاتا تھا اور اس نے سلمان خان سے 5 کروڑ روپے تاوان کا مطالبہ بھی کیا تھا۔ پولیس کا مزید بتانا تھا کہ ممبئی ٹریفک پولیس کو دھمکی آمیز پیغام موصول ہونے کے بعد نامعلوم شخص کے خلاف مقدمہ درج کر کے تفتیش شروع کی گئی تھی۔
ابتدائی طور پر 18 اکتوبر کو ملزم نے ممبئی ٹریفک پولیس کے کنٹرول روم کے نمبر پر دھمکی آمیز پیغام بھیجا تھا جس کے بعد رواں ماہ کی 21 تاریخ کو ممبئی پولیس کو ملزم کے پیغام میں معافی نامہ بھی موصول ہوا تھا جس میں کہا گیا کہ یہ پیغام غلطی سے بھیجا گیا۔ پولیس نے پیغام بھیجنے والے شخص کی لوکیشن جھارکھنڈ سے ٹریک کی تھی اور پیغام بھیجنے والے شخص نے دعویٰ کیا کہ وہ لارنس بشنوئی گروہ کے قریب ہے جب کہ اس نے بھتہ نہ دینے پر سلمان خان کی جان کو لاحق خطرے سے بھی خبردار کیا تھا۔
