قومی باکسر محمد وسیم کو ڈنمارک ایمبیسی سے پاسپورٹ نہ ملنے کی وجہ سے مالٹا مین ہونے والی ڈبلیو بی ایف بینٹم ویٹ ٹائٹل فائٹ متاثر ہونے کا خدشہ ہے۔
سماجی رابطے کی ویب سائٹ ایکس پر وزیراعلیٰ پنجاب مریم نواز کے نام اپنے پیغام میں پاکستانی باکسر محمد وسیم کا کہنا تھا کہ وزیراعظم پاکستان اور وزیراعلیٰ پنجاب سے پاسپورٹ واپس دلوانے کی اپیل کرتا ہوں، پاسپورٹ نہ ملا تو مالٹا میں 4 اکتوبر میں ہونے والی فائٹ کی تیاری متاثر ہوگی۔
محمد وسیم کے مطابق انہوں نے ڈنمارک کے ویزے کے لیے 22 جولائی کو پاسپورٹ جمع کرایا تھا، فائٹ قریب ہے اور پاسپورٹ نہ ملنے کے باعث ٹریننگ کیمپ میں شامل نہ ہونے پر مشکلات ہیں۔
ان کا مزید کہنا تھا کہ 4 اکتوبر کو عالمی ٹائٹل کےلیے فائٹ ہے اور ان کے پاس پاسپورٹ نہیں ہے، تاہم جلد پاسپورٹ واپس کیا جائے تاکہ وہ اپنی فائٹ کی تیاری کر سکیں۔
