مانسہرہ میں سیاحتی مقام ناران میں گلیشئر تلے دب کر باپ بیٹے سمیت 3 سیاح جاں بحق ہو گئے، یہ واقعہ ناران کے قریب سہنی آبشار کے مقام پر پیش آیا، تینوں افراد کا تعلق لاہور سے ہے۔
پولیس ذرائع کے مطابق سیر و تفریح کیلئے آنے والے سیاح گلیشئر والی سوہنی آبشار کے قریب فوٹو سیشن کروارہے تھے کہ اچانک گلیشئر نیچے گر گیا، جاں بحق ہونے والوں میں 35 سالہ طاہر، 13 سالہ ابو بکر اور 22 سالہ طیب شامل ہیں۔ جاں بحق افراد میں باپ بیٹا اور ایک کزن شامل ہیں۔
واقعے کے بعد سیاحوں کو غیر محفوظ اور غیر مستحکم علاقوں سے گریز کرنے اور خطرناک حالات میں سیلفیاں لینے سے باز رہنے کی ہدایت کی گئی ہے، جبکہ اس کے ساتھ ہی اس قسم کے واقعات سے بچاؤ کے لیے سیاحتی مقامات پر سیکیورٹی پروٹوکول کا ازسرِ نو جائزہ لینے کی ہدایت جاری کر دی ہے۔
