فیصل آباد میں گھر کے اندر آگ لگنے سے تین کمسن بہن بھائی ہلاک ہو گئے، جبکہ ان کی تین سالہ بہن اور والد جھلس کر زخمی ہو گئے۔
تفصیلات کے مطابق یہ واقعہ منگل کو فیصل آباد کے علاقے امیر ٹاؤن میں پیش آیا۔ ریسکیو ذرائع کا کہنا ہے کہ جاں بحق ہونے والے بچوں کی شناخت چھ ماہ کی امبر، آٹھ سالہ ارسلان اور چھ سالہ ایمان کے نام سے ہوئی ہے۔3 سالہ نور فاطمہ اور اس کے والد عبداللہ جھلس کر زخمی ہوگئے جنہیں طبی امداد کے لیے الائیڈ اسپتال منتقل کیا گیا۔
اس سے قبل لاہور میں اسی طرح کے ایک واقعے میں جنوری میں چار بچے اپنے گھر میں آگ لگنے سے جھلس کر ہلاک ہو گئے تھے۔ریسکیو ذرائع کا کہنا ہے کہ آگ لاہور کے علاقے بابا اعظم میں واقع ایک گھر کے کمرے میں لگی۔ جس کے نتیجے میں نور فاطمہ، ایمان فاطمہ، اسماعیل اور ابراہیم نامی چار کمسن بچے جان کی بازی ہار گئے۔
