ضلع مانسہرہ کے علاقے پتلانگ کے قریب پیر کو مسافر وین کھائی میں گرنے سے کم از کم تین افراد جاں بحق جبکہ 10 زخمی ہوگئے۔
حادثہ گاڑی کے بریکوں میں خرابی کے باعث پیش آیا جس کے باعث وین سڑک سے اُلٹ کر کھائی میں جاگری۔ پولیس اور امدادی ٹیموں نے فوری طور پر جائے وقوعہ پر پہنچ کر زخمیوں کو طبی امداد کے لیے بالاکوٹ کے سول اسپتال منتقل کر دیا۔پولیس ذرائع نے تصدیق کی کہ زخمیوں میں خواتین اور بچے بھی شامل ہیں اور چند کی حالت تشویشناک بتائی جاتی ہے جنہیں بعد ازاں کنگ عبداللہ ٹیچنگ ہسپتال مانسہرہ منتقل کر دیا گیا۔
