لاہور ہائیکورٹ کے 3ججزکو بھی دھمکی آمیز خطوط موصول ہوئے ہیں
لاہور ہائیکورٹ کے تین ججز کو رجسٹرار آفس نےدھمکی آمیز خطوط موصول ہونے کی تصدیق کی ہے۔رجسٹرار آفس نے بتایا کہ خطوط جسٹس شجاعت علی خان، جسٹس شاہد بلال حسن اور جسٹس عالیہ نیلم کےنام بھجوائےگئے ہیں جبکہ خط موصول کرنے والے لاہور ہائیکورٹ کے تینوں ججز انتظامی کمیٹی کے رکن ہیں۔سی ٹی ڈی اورپولیس افسران لاہور ہائیکورٹ کے ججز کو دھمکی آمیز خط موصول ہونے کے بعد لاہور ہائیکورٹ پہنچ گئے اور ساتھ ہی عدالت کی سکیورٹی بھی سخت کردی گئی ہے۔
فرانزک ٹیمیں مشکوک خطوط کی جانچ کے لیے ہائیکورٹ پہنچ گئی ہیں جبکہ ہائیکورٹ کے سی سی ٹی وی کیمروں سے جائزہ لیا جا رہا ہے۔یاد رہے کہ اسلام آباد ہائیکورٹ کے چیف جسٹس عامر فاروق سمیت 8 ججز کو گزشتہ روز مشکوک خطوط موصول ہوئے تھے جس پردھمکانے والا نشان اور پاؤڈر پایا گیا تھا۔
