راولپنڈی میں اپنی شادی کی تقریب کے دوران ہوائی فائرنگ کرنے کے کیس میں گرفتار دلہن کی ضمانت منظور کر لی گئی ہے، جبکہ دولہا شہریار کو بھی عبوری ضمانت مل گئی ہے اور عدالت نے ان کی گرفتاری سے روک دیا ہے۔
ڈیوٹی سول جج گوجر خان آفتاب احمد نے دلہن کی ضمانت کی درخواست پر سماعت کرتے ہوئے ان کی رہائی کا حکم دیا اور 50 ہزار روپے کے ضمانتی مچلکے جمع کرانے کی ہدایت کی۔ عدالت کے حکم کے بعد دلہن کے مچلکے ان کے سسر نے جمع کرائے، جس کے بعد ان کی رہائی کے روبکار جاری کر دیے گئے۔
دوسری جانب ایڈیشنل ڈسٹرکٹ اینڈ سیشن جج باسط علیم نے دولہا شہریار کی جانب سے دائر ضمانت کی درخواست پر سماعت کرتے ہوئے 9 اپریل تک عبوری ضمانت منظور کر لی اور متعلقہ حکام کو انہیں گرفتار نہ کرنے کا حکم جاری کیا۔
