ن لیگی رہنما چوہدری تنویر نے چوہدری عدنان کے قتل میں ملوث ہونے کے الزامات مسترد کردیئے۔ ایک پریس کانفرنس میں ان کا کہنا تھا کہ انہیں قتل میں ملوث کرنے کیلئے تفیش تبدیل کی جا رہی ہے، ایک پولیس افسر کا نام جلد ثبوتوں کے ساتھ سامنے لایا جائے گا۔
راولپنڈی میں چوہدری تنویر نے اپنے بیٹے ایم این اے بیرسٹر دانیال چوہدری، حنیف عباسی، سردار نسیم اور دیگر کے ہمراہ پریس کانفرنس سے خطاب کرتے ہوئے کہا کہ شہید سابق ایم پی اے چوہدری عدنان ہمارا قریبی عزیز اور رشتے میں بھانجا تھا جنہیں بے گناہ قتل کر دیا گیا تھا اور اب راولپنڈی شہر میں پراپرٹی سے وابستہ ایک شخص تفتیش کو تبدیل کروا رہا ہے۔ انہوں نے مطالبہ کیا کہ اچھی شہرت کے حامل افسران پر مشتمل جے آئی ٹی بنائی جائے۔
ن لیگی رکن قومی اسمبلی حنیف عباسی نے کہا اس کیس میں انتہائی عجلت کا مظاہرہ کیا جارہا ہے، چوہدری تنویر کانام شامل کرکے کیس کا رخ موڑنے اور اصل مجرموں کو بچانے کی سازش کی جارہی ہے۔اس کیس میں درپردہ کچھ اور لوگ ملوث ہیں،حنیف عباسی نے کہا کوشش ہے کہ بے قصور انسان کے قتل میں ملوث اصل لوگ گرفتار ہوں ۔
