وزیر خزانہ محمد اورنگزیب نے کہا ہے کہ پاکستان آئی ایم ایف سے اہم مذاکرات کیلئے رسمی درخواست کرنے والا ہے۔
وزیر خزانہ محمد اورنگزیب نے ایوان صدرمیں صحافیوں سے گفتگو کرتے ہوئے کہا توقع ہے آئی ایم ایف اسٹاف کے ساتھ یہ مذاکرات رواں ہفتے شروع ہوجائیں گے ۔کیونکہ آئی ایم ایف پروگرام میں جانا ناگزیرہے۔انہوں نے کہا کہ موجودہ مالی سال 2024ایک مشکل سال ہوگا لیکن جلد تمام مسائل پر گفتگو کیلیے میڈیا کے ساتھ بیٹھیں گے۔بریفنگ لے کر بات کروں گا۔
اپنی تمام ترتوانائیاں پاکستان کو درپیش مشکلا ت کے حل کیلیے استعمال کروں گا۔اب باتیں زیادہ ہورہی ہیں لیکن اب ایکشن کا وقت آگیا ہے۔وزیر خزانہ نے کہا اسٹاف کے ساتھ مذاکرات رواں ہفتے شروع ہوں گے۔یاد رہے کہ گزشتہ روز وفاقی کابینہ نے وزیر خزانہ محمد اورنگزیب کی پاکستانی شہریت دوبارہ حاصل کرنے کی درخواست منظور کر لی ہے۔
وزیر خزانہ محمد اورنگزیب نے نجی بینک کے چیف ایگزیکٹو آفیسر اور صدر کے عہدے سے بھی استعفی دے دیا ہے جہاں وہ 30اپریل 2018سے فرائض انجام دے رہے تھے۔دوسری جانب وزیر خزانہ محمد اور نگزیب 15سے 20اپریل تک امریکا کا دورہ کریں گے۔ذرائع کا کہنا ہے کہ وزیر خزانہ واشنگٹن میں آئی ایم ایف اور ورلڈ بینک کے سالانہ وزارتی اجلاس میں شرکت کریں گے۔وزارتی اجلاس 17سے 19اپریل تک شیڈول ہیں، محمد اورنگزیب اجلاسوں میں پاکستانی وفد کی قیادت کریں گے۔وزیر خزانہ کے ہمراہ گورنر سٹیٹ بینک، سیکرٹری خزانہ اور سینئر حکام شریک ہوں گے
