پاک ایران کشیدگی، قومی سلامتی کمیٹی اور وفاقی کابینہ کا اجلاس طلب کر لیا گیا ۔
زرائع کے مطابق قومی سلامتی کمیٹی کا اہم اجلاس آج ہو گا۔ اجلاس کی صدارت نگران وزیر اعظم انوارالحق کاکڑ کریں گے۔ چیئرمین جوائنٹ چیفس آف سٹاف کمیٹی،آرمی چیف، نیول اور پاک فضائیہ کے چیف اور خفیہ اداروں کے حکام شریک ہوں گے۔اجلاس میں پاک ایران کشیدگی پر بریفنگ دی جائے گی۔
تفصیلات کے مطابق قومی سلامتی کمیٹی امن و امان کی صورتحال پر اہم فیصلے بھی کرے گی۔اس کے علاوہ وفاقی کابینہ کا اجلاس بھی آج ہو گا جس میں ملک کی موجودہ سلامتی کی صورتحال پر غور کیا جائے گا۔یاد رہے کہ پاکستان نے میزائل حملے کا جواب دیتے ہوئے ایرانی صوبہ سیستان و بلوچستان میں دہشتگردوں کے ٹھکانوں کو نشانہ بنایا۔انٹیلی جنس بیسڈ آپریشن کو مرگ بر سرمچار کا نام دیا گیا تھا۔اس دوران پاکستان میں کارروائیاں کرنے والے متعدد دہشتگرد جہنم واصل ہوئے تھے۔ دوسری جانب دفتر خارجہ کی ترجمان نے آپریشن پر بریفنگ دیتے ہوئے کہا تھا کہ ہمارے سنجیدہ تحفظات پر عمل نہ ہونے کی وجہ سے نام نہاد سرمچار بے گناہ پاکستانیوں کا خون بہاتے رہے۔
