ممبئی بالی ووڈ اسٹار گووندا گولی لگنے سے زخمی ہوگئے ،گولی ان کی ٹانگ میں لگی ،جس کے بعد انہیں اسپتال منتقل کردیا گیاـ
غیر ملکی میڈیا کے مطابق جب اداکار گووندا کو گولی لگی تو اس وقت وہ اپنی رہائش گاہ پر اکیلے تھے۔گولی گووندا کواپنے ہی ریوالور سے حادثاتی طور پر لگی ،جس کے بعد وہ زخمی ہو گئے تھے اور اداکار کو زخمی حالت میں اسپتال منتقل کردیا گیا تھا۔
رپورٹ کے مطابق اداکار گووندا نے اسپتال سے جاری اپنے پیغام میں کہا تھا کہ اپنے مداحوں کی دعاؤں اور نیک تمناؤں کا شکریہ ادا کرتا ہوں۔ پرستاروں، والدین اور گورو کی دعاؤں اور نیک تمناؤں نے مھجے بچا لیا ہے۔مجھے گولی لگی تھی لیکن اب اسے نکال دیا گیا ہے۔ میں ڈاکٹروں کا بھی بہت مشکور ہوں۔
گووندا کو گولی لگنے کا واقعہ منگل کی صبح پونے 5 بجے پیش آیا ۔ گووندا کے مینجر ششی سنہا نے میڈیا کو بتایا کہ کولکتہ میں ایک شو تھا اور صبح 6 بجے کی فلائٹ تھی، میں ائیرپورٹ پہنچ چکا تھا اور گووندا نکل رہے تھے جب ان سے غلطی سے گولی چل گئی جو ان کی ٹانگ میں لگی۔
ششی سنہا کے مطابق ریوالور الماری میں رکھنے کے دوران گرگیا اور غلطی سے فائر ہوگیا۔ گووندا جی کو صرف ایک ٹانگ پر چوٹ آئی اور ان کا زخم خطرناک نہیں ہے۔اسپتال میں ایک چھوٹے سے آپریشن کے بعد گووندا کی ٹانگ سے گولی نکال لی گئی ہے۔
گووندا 90 کی دہائی میں کامیڈی ہیرو کے طور پر بےحد مقبول تھے۔ گووندا کی مقبول فلموں میں آنکھیں (1993)، راجا بابو (1994)، قُلی نمبر 1 (1995)، دیوانہ مستانہ (1997)، دُلہے راجہ (1998)، بڑے میاں چھوٹے میاں (1998)، اناڑی نمبر 1 (1999) اور جوڑی نمبر 1 (2001) شامل ہیں۔
