راولپنڈی کی اڈیالہ جیل کے باہر میڈیا کوریج کرنے پر پابندی لگادی گئی ہے۔ تفصیلات کے مطابق بانی پی ٹی آئی سے عمران خان سے آج ملاقاتوں کا دن ہےتاہم پولیس نے اڈیالہ جیل کے باہر میڈیا کوریج پر پابندی لگادی ہے، راولپنڈی پولیس نے اڈیالہ جیل گیٹ نمبر 5 کے باہر میڈیا گاڑیوں کی پارکنگ پر بیرئیر لگادئیے۔
اس حوالے سے موقع موجود سیکورٹی اہلکاروں کا کہنا ہے کہ میڈیا کو آج کوریج کی اجازت نہیں ہے، میڈیا ٹیمیں جیل سے 2 کلومیٹر دور چلی جائیں۔ ادھر پاکستان تحریک انصاف کے رہنماء اور رکن قومی اسمبلی بیرسٹر گوہر نے عمران خان سے ملاقات کیلئے اسلام آباد ہائیکورٹ سے رجو ع کرلیا، عدالت میں دی گئی درخواست میں سیکرٹری داخلہ، چیف کمشنر اسلام آباد، سپرنٹنڈنٹ اڈیالہ جیل کو فریق بناتے ہوئے موقف اپنایا گیا ہے کہ چیئرمین پی ٹی آئی گوہر علی خان، سیکریٹری جنرل عمر ایوب اور سیکریٹری شبلی فراز بانی پی ٹی آئی سے ملاقات کرنا چاہتے ہیں اڈیالہ جیل حکام کو عمران خان سے ملاقات کرنے کی اجازت دینے کے احکامات جاری کیے جائیں۔
