مانسہرہ: تھانہ ناران پولیس نے بھکاریوں کے خلاف کریک ڈاون کرتے ہوئے درجنوں پیشہ ور بھکاریوں کو گرفتار کرلیا ۔
ڈی پی او مانسہرہ شفیع اللہ گنڈا پور کی خصوصی ہدایات پر پیشہ ور بھکاریوں کے خلاف جاری کارروائیوں کے تسلسل میں تھانہ ناران پولیس نے ایک مؤثر اور منظم آپریشن کے دوران درجنوں بھکاریوں کو حراست میں لے کر ان کا مکمل ڈیٹا حاصل کیا اور انہیں ان کے آبائی علاقوں کو واپس روانہ کر دیا ۔
پولیس کے مطابق یہ بھکاری مختلف شہروں سے مانسہرہ آ کر سڑکوں، بازاروں اور سیاحتی مقامات پر عوام کے لیے پریشانی اور خلل کا باعث بن رہے تھے ۔
پولیس کا مزید کہنا تھا کہ ضلع کے دیگر تھانوں میں بھی اسی نوعیت کی کارروائیاں جاری ہیں اور پیشہ ور بھکاریوں کے خلاف سخت اور مسلسل کریک ڈاؤن عمل میں لایا جا رہا ہے ۔
