جنگی جنون میں مبتلا اسرائیل فلسطینیوں کی نسل کشی سے باز نہ آیا۔ایک ہی دن میں مزید 118 فلسطینیوں کو شہید کردیا۔
فلسطینی وزارت صحت کے مطابق اسرائیلی فوج کے حملوں کے نتیجے میں فلسطینی شہدا کی مجموعی تعداد 27 ہزار اور زخمیوں کی تعداد 66ہزار سے تجاوز کر گئی۔اسرائیلی فوج نے مرکزی علاقوں کے بعد سرحدی علاقے رفح کی جانب پیش قدمی شروع کر دی۔اسرائیلی وزیر دفاع کا کہنا تھا کہ زمینی کارروائی کے لیے ہمارا اگلا ٹارگٹ رفح کا علاقہ ہے۔ انہوں نے اس بات پر زور دیا کہ حماس کے خلاف جنگ جیتنے کے لیے ہمیں رفح پہنچنا لازمی ہے۔
قبل ازیں اسرائیلی وزیر دفاع یواو نے اعلان کیا کہ اسرائیلی فورسز نے 4ماہ سے جاری جنگ کے دوران جنوبی غزہ کی پٹی میں شہر خان یونس میں حماس کی بٹالین کو ختم کر دیا ہے، اور یہ بھی دعوی کیا کہ اسرائیل نے 10ہزار فلسطینی عسکریت پسندوں کو ہلاک اور اتنی ہی تعداد میں زخمی کیا ہے۔
دوسری جانب، خان یونس میں العمل ہسپتال میں آکسیجن کی قلت کے نتیجے میں مریضوں کی زندگیوں کو شدید خطرات لاحق ہو گئے ہیں۔ زیادہ تر ہسپتالوں نے مکمل طور پر کام کرنا چھوڑ دیا ہے یا سخت حالات میں کام کر رہے ہیں۔ادویات اور آلات کی کمی ہے، اور شدید زخمیوں اور بے گھر لوگوں کی مسلسل آمد کا سامنا ہے جو خالی عمارتوں میں پناہ لے رہے ہیں۔ادھر، اقوام متحدہ کے سیکریٹری جنرل انتونیوگوتریس نے ایک بارپھر امداد فراہم کرنے کی اپیل کر دی ہے۔ایک بیان میں انہوں نے کہا کہ غزہ میں انسانی ضروریات کا نظام تباہ ہو گیا ہے، ہر فرد بھوک کا شکار ہے، غزہ میں فوری اور مستقل امداد کی فراہمی یقینی بنائی جائے
