وقت پر جلسہ ختم نہ کرنے، پولیس پر پتھراؤ اور روٹ کی خلاف ورزی پر اسلام آباد پولیس نے پی ٹی آئی قیادت کیخلاف 3 مقدمات درج کر لیے۔
پی ٹی آئی قیادت کے خلاف پر امن اجتماع اور امن عامہ بل کے تحت مقدمات درج کیے گئے ہیں۔
پولیس ذرائع کے مطابق پی ٹی آئی جلسے کے منتظمین کے خلاف تین مقدمات درج کیے گئے ہیں، پہلا مقدمہ تھانہ سنگجانی میں جلسے کے معینہ وقت کی پاس داری نہ کرنے پر درج کیا گیا، دوسرا مقدمہ تھانہ سمبل میں معینہ روٹ کی خلاف ورزی کرتے ہوئے قافلے سادات کالونی اور سری نگرہائی وے سے لانے پردرج کیاگیا، جبکہ تیسرا مقدمہ ایس ایس پی سیف سٹی سمیت دیگر اہل کاروں پر پتھراؤ کرنے پرتھانہ نون میں درج کیاگیا۔
مقدمات میں زرتاج گل، عامر مغل، شعیب شاہین، عمر ایوب، سیمابیہ طاہر اور راجا بشاورت سمیت 28 مقامی رہنما شامل ہیں۔
