ایران اور اسرائیل کے درمیان جاری کشیدگی میں مزید اضافہ دیکھنے میں آ رہا ہے، جہاں ایران کی جانب سے اسرائیل اور خطے کے مختلف مقامات پر حملوں کے دعوے کیے گئے ہیں۔
روسی میڈیا کے مطابق ایران نے تل ابیب میں کثیر المنزلہ عمارتوں کو نشانہ بنایا، جس کے بعد اسرائیلی فضائی حدود میں میزائل داخل ہوتے ہی سائرن بج اٹھے اور شہریوں کو شیلٹرز میں پناہ لینا پڑی۔ اسرائیلی حکام نے ایران کے کلسٹر بم حملوں میں ایک شخص کی ہلاکت اور دو افراد کے زخمی ہونے کی تصدیق کی ہے۔
ایرانی میڈیا کے مطابق فوج نے کویت میں الشویخ بندرگاہ پر امریکا کے چھ ٹیکٹیکل بحری جہازوں کو نشانہ بنایا۔ دعوے کے مطابق ان میں سے تین لڑاکا جہاز سمندر میں غرق ہوگئے جبکہ باقی تین میں آگ لگ گئی۔
پاسدارانِ انقلاب کے مطابق "وعدہ صادق چہارم” نامی آپریشن کے تحت دشمن پر حملوں کی 84ویں لہر میں دبئی کے ساحل اور ایک ہوٹل کو خودکش ڈرونز سے نشانہ بنایا گیا، جہاں مبینہ طور پر امریکی اہلکار موجود تھے۔ ایرانی حکام نے دعویٰ کیا ہے کہ ان حملوں میں کئی امریکی فوجی ہلاک ہوئے۔
مزید برآں سعودی عرب کے علاقے الخرج میں واقع پرنس سلطان ایئر بیس کو بھی نشانہ بنانے کا دعویٰ کیا گیا ہے، جہاں ری فیولنگ اور ایئرپورٹ فلیٹ کو ہدف بنایا گیا۔
