ضلع راولپنڈی کے تھانہ کلرسیداں کے علاقے میں ڈکیتی کی اندوہناک واردات کے دوران ڈاکوؤں نے بیوی اور معصوم بچے کے سامنے فائرنگ کرکے گھر کے سربراہ کو قتل کر دیا۔ ڈاکو واردات کے بعد فرار ہوگئے۔ پولیس ذرائع کے مطابق ڈکیتی کے دوران ملزمان کی فائرنگ سے جاں بحق ہونے والا عابد حسین اپنی بیوی اور کم سن بچے کے ساتھ اپنے سسرال سے واپس گھر جا رہا تھا کہ ملزمان نے واردات کی۔
ڈکیتی کی واردات کے دوران مقتول نے مزاحمت کی جس پر ملزمان نے عابد حسین کو گولیاں مار دیں جس سے وہ موقع پر ہی جاں بحق ہوگیا جبکہ ملزمان موقع سے فرار ہوگئے، مقتول اپنے خاندان کا واحد کفیل تھا۔ پولیس اطلاع کے باوجود ملزمان کو ابھی تک پکڑنے میں کامیاب نہیں سکی تاہم مقدمہ درج کرکے تحقیقات کا آغاز کر دیا گیا ہے۔
