پاکستان تحریک انصاف (پی ٹی آئی) کے بانی چیئرمین عمران خان نے اپنی نااہلی کے خلاف زیر التوا اپیل کی جلد سماعت کے لیے سپریم کورٹ سے رجوع کرلیا۔
بانی پی ٹی آئی کے وکیل علی ظفر کی جانب سے دائر درخواست میں استدعا کی گئی ہے کہ پی ٹی آئی بانی کی نااہلی کے خلاف دائر اپیل کو جلد سماعت کے لیے مقرر کیا جائے۔ درخواست میں کہا گیا ہے کہ الیکشن کمیشن آف پاکستان (ای سی پی) کے فیصلے کے خلاف اسلام آباد اور لاہور ہائی کورٹس میں مقدمات زیر سماعت ہیں۔
بیرسٹر علی ظفر کی درخواست میں یہ بھی کہا گیا ہے کہ نااہلی کے باعث عمران خان نہ تو رکن اسمبلی منتخب ہو سکتے ہیں اور نہ ہی چیئرمین پی ٹی آئی۔ زیر التوا اپیل کی وجہ سے وہ ضمنی انتخابات میں حصہ نہیں لے سکتے۔ اگر ممکن ہو تو عدالت سے استدعا ہے کہ زیر التوا درخواستوں کو جلد سماعت کے لیے طے کیا جائے۔واضح رہے کہ بانی پی ٹی آئی عمران خان نے 10 جنوری 2024 کو سپریم کورٹ میں نااہلی کے خلاف اپیل دائر کی تھی۔
