گلگت: ڈسٹرکٹ کلکٹر/ ڈپٹی کمشنر گلگت امیراعظم حمزہ نے ریونیو ریکارڈ میں ہونے والے 441 غیر قانونی اراضی انتقالات منسوخ کر دیئے۔ تفصیلات کے مطابق ڈسٹرکٹ کلکٹر/ ڈپٹی کمشنر گلگت امیراعظم حمزہ نے بحکم چیف سیکرٹری گلگت بلتستان و عوامی شکایات کو مدنظر رکھتے ہوئے سال 2002 میں مکمل ہونے والی جدید بندوبست کے بعد ریونیو ریکارڈ میں ہونے والے 441 غیر قانونی انتقالات (جن کے ذریعے اراضیات کو غیر قانونی طور پر مختلف اشخاص کو منتقل کیا گیا تھا )کو منسوخ کردیا ۔
ان انتقالات کا تعلق تحصیل گلگت کے (17) ، تحصیل دنیور کے (11) اور تحصیل جگلوٹ کے 06 موضوعات سے ہے۔ ان انتقالات کے ذریعے تقریباً 5400 کنال زمین غیر قانونی ذریعے سے اگے منتقل کی گئی،جس میں تحصیل گلگت کے 336، تحصیل دنیور کے 59، اور تحصیل جگلوٹ کے 44 انتقالات شامل ہیں ۔کلکٹر / ڈپٹی کمشنر گلگت کی جانب سے ریکارڈ مال میں بے ضابطگیوں کے حوالے سے سال 2011 کے بعد ہونے والی سب سے بڑی کارروائی ہے۔
