ملک میں مقیم غیر قانونی افراد کی اپنے وطن واپسی کا سلسلہ جاری ہے۔ابتک 4لاکھ 69ہزار کے قریب افغان باشندوں کی اپنے وطن واپسی ہوچکی ہے۔
حکومت پاکستان اور عسکری قیادت کی مشترکہ کاوشوں سے ملک سے غیر قانونی افراد کا انخلا بدستور جاری ہے۔سرکاری اعداد وشمار کے مطابق گزشتہ روز مزید 778غیر قانونی افغان باشندے اپنے ملک چلے گئے۔ واپس جانے والوں میں 214مرد، 143خواتین اور 421بچے شامل ہیں۔افغانستان روانگی کیلئے 42گاڑیوں میں 72خاندانوں کی اپنے وطن واپسی عمل میں لائی گئی ہے۔ وفاقی حکومت کے اعلان سے قبل بھی غیر قانونی افغان باشندوں کی کثیر تعداد گرفتاری کے ڈر سے پاکستان سے واپس افغانستان جاتی رہی تاہم سرکاری اعداد وشمار کے مطابق 15جنوری تک مجموعی طور پر 4لاکھ 68 ہزار 929افغان باشندے اپنے ملک جا چکے ہیں۔یاد رہے کہ کراچی سمیت دیگر شہروں میں غیر قانونی طور پر مقیم افراد کی بڑی تعداد موجود تھی جسکی وجہ ملک میں سمگلنگ اور بھتہ خوری کی واردتیں بڑھ رہی تھیں۔
