ملک میں عام انتخابات 2024کے حوالے سے پاک فوج کی تعیناتی سے متعلق اہم معلومات سامنے آ گئی ہیں۔
افواج پاکستان آئین پاکستان کے آرٹیکل 245کے تحت الیکشن 2024کے انعقاد میں معاونت کریں گی۔ پاک فوج متعلقہ علاقوں میں تیسرے نمبر پرکوئیک ری ایکشن فورس جیسی ڈیوٹی سر انجام دے گی۔الیکشن کے دوران امن عامہ کی صورتحال کو بہتر رکھنے کی پہلی ذمہ داری پولیس کی ہے جبکہ سول آرمڈ فورسز جیسا کہ رینجرز اور فرنٹیئر کور دوسرے مرحلے میں سکیورٹی کی ذمہ دار ہوں گی ۔ آرمی تیسرے مرحلے میں پولنگ کے جنرل علاقوں میں کسی بھی سیکورٹی کی صورت حال سے نمٹنے کے لئے تعینات ہوگی۔
سول آرمڈ فورسز اور افواجِ پاکستان آئین پاکستان کے آرٹیکل 220، 245بشمول تمام شقوں اور ذیلی شقوں کے اپنے فرائض انجام دیں گی۔سول آرمڈ فورسز اور افواج پاکستان کا عملہ محفوظ ماحول کی فراہمی کے لیے تعاون کرے گا تاکہ ڈسٹرکٹ ریٹرننگ آفیسر، ریٹرننگ آفیسر پریذائیڈنگ آفیسر اور پولنگ کا عملہ اپنے فرائض کو خوش اسلوبی سے انجام دے سکے۔انتخابی سامان کی ریٹرننگ آفیسر ز کے دفاتر سے پولنگ اسٹیشنز تک ترسیل، گنتی اور انتخابی عمل مکمل ہونے کے بعد انتخابی سامان کی واپسی ریٹرننگ آفیسر ز کے دفاتر تک منتقلی کے لیے سکیورٹی مہیا کی جائے گی۔
خیال رہے کہ الیکشن کے روز دفعہ 144 کے تحت ہتھیاروں کی نمائش پر پابندی ہو گی۔ہر آفیسر اور جے سی او الیکشن کمیشن آف پاکستان کے جاری کردہ نوٹیفکیشن کے تحت اپنے اختیارات کا بر وقت استعمال کرے گا۔محفوظ ماحول کو یقینی بنانے کیلئے پولیس پہلے مرحلے کی ذمہ دار، جبکہ سول آرمڈ فورسز اور افواج پاکستان بالترتیب دوسرے مرحلے اور تیسرے مرحلے کی ذمہ دار ہوں گی
