پاکستان کرکٹ ٹیم کے سابق کپتان شعیب ملک نے دوسری شادی کر لی۔ اس بار قرعہ فال اداکارہ ثنا جاوید کے لیے نکلا ہے۔
شعیب ملک نے یہ خبر سماجی رابطے کی ویب سائٹ ٹوئٹر پر سنائی۔ انہوں نے تصاویر شیئر کرتے ہوئے لکھا کہ ’الحمداللہ، اور ہم نے تمہیں جوڑوں میں پیدا کیا‘۔ واضح رہے کہ اداکارہ ثنا جاوید نے سوشل میڈیا اکاؤنٹ انسٹاگرام پر اب اپنا نام ’ثنا جاوید‘ تبدیل کرکے ’ثنا شعیب ملک‘ رکھ دیا ہے۔
واضح رہے کہ ثنا جاوید نے گلوکار عمیر جیسوال سے پہلی شادی کی تھی جبکہ شعیب ملک نے پہلی شادی بھارتی ٹینس اسٹار ثانیہ مرزا سے کی تھی۔ سوشل میڈیا پر دونوں جوڑوں کے درمیان علیحدگی کی افواہیں تھیں تاہم دونوں کی جانب سے علیحدگی یا طلاق سے متعلق کوئی تصدیق یا تردید نہیں کی گئی تھی۔
کیا شعیب ملک اور ثانیہ مرزا کے درمیان طلاق ہوگئی؟
شعیب ملک کرکٹ کی دنیا کا بڑا نام جبکہ ثانیہ مرزا مشہور بھارتی ٹینس اسٹار ہیں۔ یہ جوڑا اپریل 2010 میں شادی کے بندھن میں بندھا تھا۔ ثانیہ مرزا اور شعیب ملک کے ہاں شادی کے آٹھ سال بعد 2018 میں بیٹے کی ولادت ہوئی تھی۔ شعیب ملک کی ثنا جاوید سے شادی کے بعد بھی شعیب اور ثانیہ کے درمیان طلاق سے متعلق کوئی تصدیق نہیں سامنے آئی۔
