پشاور: کابینہ اجلاس سے خطاب میں وزیراعلیٰ خیبرپختونخوا نے کہا ہے کہ صوبے میں امن و امان کی بگڑتی صورتحال پر اگلے ہفتے آل پارٹیز کانفرنس (اے پی سی) بلائی جا رہی ہے جس میں تمام سیاسی جماعتوں کے نمائندوں کو مشاورت کیلئے مدعو کیا جائے گا تاکہ اس مسئلے کے پائیدار حل کیلئے مشترکہ لائحہ عمل مرتب کیا جا سکے ۔
علی امین گنڈاپور نے کہا ہے کہ صوبائی حکومت کی کوششوں سے ضلع کرم میں امن بحال ہوا جبکہ جرگوں اور مقامی عمائدین کی مشاورت سے دیگر علاقوں میں بھی امن قائم کیا جا سکتا ہے ۔
اجلاس میں 3 ایم پی او کے قانون پر غور کرتے ہوئے اس میں اصلاحات لانے کا فیصلہ کیا گیا، کابینہ نے فیصلہ کیا کہ 3 ایم پی او کا نفاذ صوبائی محکمہ داخلہ کی پیشگی اجازت سے مشروط ہو گا تاکہ اس قانون کے غلط استعمال کو روکا جا سکے ۔
اجلاس میں بھارتی جارحیت میں شہید ہونے والے خیبرپختونخوا کے شہداء کے لواحقین کیلئے فی کس 50 لاکھ روپے معاوضے کی منظوری دی گئی جبکہ دہشتگردی کے واقعے میں شہید ہونے والے مولانا خانزیب کے ورثاء کیلئے ایک کروڑ روپے امداد کی منظوری دی گئی ۔
