اسلام آباد: پاکستان میں شیڈول آئی سی سی ٹرافی کے معاملے پر چیئرمین پاکستان کرکٹ بورڈ محسن نقوی نے وزیراعظم شہباز شریف سے ملاقات کی ہے اور اس حوالے سے پیشرفت سے آگاہ کیا ۔
اس موقع پر وزیراعظم نے چئیرمین پی سی بی محسن نقوی کے اصولی موقف کو سراہا،اور آئی سی سی کے معاملے پر محسن نقوی کے موقف پر اعتماد کا اظہار بھی کیا ۔
شہباز شریف کا کہنا تھا کہ آئی سی سی میں آپ نے پاکستان کے 24 کروڑ عوام کی ترجمانی کی، پاکستان کی عزت سب سے پہلے ہے اور اس کے بعد کچھ اور ہے، ٹورنامنٹ سے متعلق آپ کا موقف ہر پاکستانی کے دل کی آواز ہے ۔
شہباز شریف نے کہا کہ پاکستان میں آئی سی سی ٹرافی ٹورنامنٹ کے انعقاد کیلئے مکمل طور پر تیار ہے ۔
محسن نقوی نے کہا کہ پی سی بی پاکستان میں آئی سی سی ٹرافی ٹورنامنٹ کےانعقادکے لیے تیار ہے، ہم پاکستان اور کرکٹ کی جیت چاہتے ہیں، اس ٹرافی سےمتعلق اچھی خبر سامنےآئےگی ۔
