قومی کرکٹ ٹیم کے سابق کپتان شاہد آفریدی کو آئندہ ماہ شروع ہونے والے ٹی ٹوئنٹی ورلڈ کپ کے لیے انٹرنیشنل کرکٹ کونسل (آئی سی سی) کا سفیر مقرر کر دیا گیا ہے۔
آئی سی سی نے شاہد آفریدی کو ٹورنامنٹ کے سفیروں کی فہرست میں شامل کرنے کا اعلان کیا ہے کیونکہ شاہد آفریدی ٹی ٹوئنٹی ورلڈ کپ جیتنے والی ٹیم کے رکن اور ٹورنامنٹ کے بہترین کھلاڑی تھے۔ آئی سی سی نے شاہد آفریدی کے علاوہ بھارتی کرکٹر یوراج سنگھ، ویسٹ انڈیز کے کرس گیل اور دنیا کے تیز ترین ایتھلیٹ یوسین بولٹ کو بھی سفیر مقرر کیا ہے۔
اس موقع پر شاہد نے کہا کہ ‘آئی سی سی ٹی ٹوئنٹی ورلڈ کپ میرے دل کے بہت قریب ہے، پہلے ورلڈ کپ میں پلیئر آف دی ٹورنامنٹ رہا، 2009 میں ٹرافی جیتی اور یہ میرے کیریئر کے قابل ذکر لمحات ہیں۔ انہوں نے مزید کہا کہ وہ 9 جون کو پاک بھارت میچ دیکھنے کے لیے پرجوش ہیں۔
