راولپنڈی میں کھلے مین ہول میں گرنے والا 6 سالہ بچہ گہرے نالے میں جاگرا اور ڈوب کر جاں بحق ہوگیا۔
یہ واقعہ تھانہ صادق آباد کے علاقے میں پیش آیا۔ بچہ گلی میں کھیلتے ہوئے مین ہول میں گرا جہاں سے وہ گہرے نالے میں جاگرا۔
واقعہ کی اطلاع پر پولیس اور امدادی ٹیمیں موقع پر پہنچ کر ریسکیو ٹیم نے بچے کو نکال کر فوری طور پر ہسپتال منتقل کیا مگر وہ جانبر نہ ہوسکا۔ بچے کی شناخت مجاہد یعقوب کے نام سے ہوئی ہے۔
اہل محلہ نے واقعہ پر شدید غم و غصے کا اظہار کرتے ہوئے کہا کہ کھلے مین ہول کی شکایت متعدد مرتبہ میونسپل کارپوریشن کو کی گئی لیکن شکایات کے باوجود کسی نے اس پر کوئی توجہ نہ دی۔
