سابق وزیرِ اعظم میاں نواز شریف نے مانسہرہ میں ایئر پورٹ بنانے کا اعلان کر دیا۔ انتخابی جلسے سےخطاب کرتے ہوئے انہوں نے کہا کہ ہم نے ملک سے لوڈشیڈنگ کا خاتمہ کیا اور سستی بجلی فراہم کی اور لوگوں کو روزگار دیا۔ نواز شریف نے کہا کہ ہماری حکومت کو مدت پوری کرنے دی گئی ہوتی تو اگلی حکومت بھی ہماری ہوتی، ہمارے دور میں مہنگائی نہیں تھی، ان ظالموں نے پاکستان کا ستیاناس کر دیا۔
سابق وزیرِ اعظم نے کہا کہ پاکستان کو دوبارہ پٹری پر لانا آسان کام نہیں، ملک کی دوبارہ تعمیر کرنا ہو گی، خیبر پختونخوا والو! آپ بھی اس جھوٹے شخص کے جھانسے میں آ گئے، آپ نے اس جھوٹے شخص کو ووٹ دیا تھا۔
نواز شریف نے کہا کہ اب خیبر پختونخوا کو سنوارنے کا وقت آ گیا ہے، اللّٰہ تعالیٰ نے موقع دیا تو مانسہرہ میں میڈیکل کالج بنائیں گے۔ میاں نواز شریف نے کہا کہ میرے دور میں سبزیاں 10 روپے فی کلو میں مل رہی تھیں، جنہوں نے بگاڑنا تھا وہ بگاڑ کر چلےگئے ہیں، یہ پاکستان کے ساتھ ظلم ہے، جان جوکھوں کا کام ہے، دوبارہ پاکستان کی تعمیر کرنی ہو گی۔
ان کا کہنا ہے کہ ان لوگوں نے پہلے سے زیادہ اس صوبے کو بگاڑ کر رکھ دیا ہے، اگر مسلم لیگ ن کی حکومت آئی تو مانسہرہ میں خوبصورت ایئر پورٹ بنے گا، کراچی سے مانسہرہ تک ٹرین چلے گی۔
