گلگت بلتستان کے معروف سیاحتی مقام فیئری میڈوز جانے والی سیاحوں کی گاڑی خوفناک حادثے کا شکار ہوگئی، جس کے نتیجے میں 7 افراد جاں بحق ہو گئے ۔
گلگت بلتستان: پولیس کے مطابق حادثہ چلاس کے علاقے میں پیش آیا جہاں سیاحوں کو لے جانے والی گاڑی گہری کھائی میں جا گری، حادثے کی اطلاع ملتے ہی پولیس، ریسکیو اہلکار اور مقامی افراد موقع پر پہنچ گئے اور امدادی کارروائیاں شروع کر دیں ۔
چلاس پولیس حکام کا کہنا ہے کہ حادثے میں 7 افراد موقع پر ہی جان کی بازی ہار گئے، جبکہ زخمیوں کو قریبی ہسپتال منتقل کر دیا گیا ہے ۔
پولیس حکام نے مزید بتایا کہ جیپ میں ڈرائیور کے ساتھ 6 سیاح سوار تھے، 2 خیبر پختونخوا جبکہ 4 سیاحوں کا تعلق پنجاب سے تھا ۔
جاں بحق ہونیوالوں میں گاڑی کے ڈرائیور کی شناخت ضیاء اللہ ساکن داریل دیامر کے نام سے ہوئی جبکہ سیاحوں میں علی اور سجاد کی شناخت ہوئی ۔
ریسکیو ذرائع کے مطابق دشوار گزار پہاڑی راستے اور گاڑی کے بے قابو ہونے کو حادثے کی ممکنہ وجوہات قرار دیا جا رہا ہے، تاہم واقعے کی مکمل تحقیقات جاری ہیں ۔
