مانسہرہ میں تھانہ بٹل پولیس نے ڈکیتی کے دوران نوجوان کو قتل کرنے والے مرکزی ملزمان کو گرفتار کرلیا،آلہ قتل بھی برآمد کیا گیا ۔
ڈی پی او مانسہرہ نے پریس کانفرنس کرتے ہوئے بتایا کہ تھانہ بٹل کی حدود میں 26 مارچ کو پیش آنے والے ڈکیتی کے دوران قتل کے افسوسناک واقعہ کا پولیس نے سنجیدگی سے نوٹس لیتے ہوئے فوری کارروائی عمل میں لائی ۔
انہوں نے بتایا کہ رات تقریباً 02:00 بجے نامعلوم نقاب پوش ملزمان شہری منور ولد محمد اشرف سکنہ ملکاں بٹل کے گھر ڈکیتی کی نیت سے داخل ہوئے اور مزاحمت پر فائرنگ کر دی، جس کے نتیجے میں منور شدید زخمی ہو کر بعد ازاں جاں بحق ہو گیا، جبکہ اس کے دادا وزیر ولد جام دین فائرنگ میں محفوظ رہے ۔
ڈی پی او مانسہرہ کا کہنا تھا کہ واقعہ کا نوٹس لیتے ہوئے پولیس حکام کے تفتیشی سٹاف پر مشتمل ایک خصوصی ٹیم تشکیل دی گئی جس نے جدید اور تکنیکی بنیادوں پر تفتیش کا آغاز کیا ۔
انہوں نے مزید بتایا کہ پولیس ٹیم نے بروقت کارروائی کرتے ہوئے واقعہ میں ملوث مرکزی ملزمان شاہنواز ولد عبدالرزاق سکنہ سلدہار بٹل اور ارباز عرف عباس ولد منور سکنہ بٹل کو گرفتار کر لیا، جبکہ شریک ملزم محمد وحید ولد ہجومت خان سکنہ بیلہ املوک بٹل کو بھی حراست میں لے لیا گیا ہے ۔
گرفتار ملزمان نے دورانِ تفتیش انکشاف کیا کہ واردات باقاعدہ منصوبہ بندی کے تحت کی گئی تاہم مزاحمت پر فائرنگ کی گئی جس کے نتیجے میں شہری جان کی بازی ہار گیا ۔
ڈی پی او مانسہرہ نے بتایا کہ گرفتار ملزمان کے قبضہ سے واردات میں استعمال ہونے والا آلہ قتل (30 بور پستول) بھی برآمد کر لیا گیا ہےاور ملزمان نے عدالت کے روبرو اقرار جرم بھی کرلیا ہے ۔
