ضلع بٹگرام میں رمضان المبارک کے دوران عوام کو ریلیف فراہم کرنے کے لیے ضلعی انتظامیہ متحرک ہوگئی، ایڈیشنل اسسٹنٹ کمشنر اختر رسول نے پرائس مانیٹرنگ ڈیسک اور مختلف بازاروں کا تفصیلی معائنہ کیا ۔
بٹگرام: ایڈیشنل اسسٹنٹ کمشنر اختر رسول نے رمضان المبارک میں قائم پرائس مانیٹرنگ ڈیسک کا دورہ کیا جہاں عوامی شکایات کا جائزہ لیا گیا، اس موقع پر سرکاری نرخنامے پر عملدرآمد کو یقینی بنانے کے لیے مختلف دکانوں کا معائنہ بھی کیا گیا ۔
حکام نے اشیائے خوردونوش کی قیمتوں، وزن اور معیار کو چیک کیا تاکہ شہریوں کو مقررہ نرخوں پر معیاری اشیاء کی فراہمی یقینی بنائی جا سکے ۔
دورانِ معائنہ خلاف ورزی کے مرتکب دکانداروں کے خلاف فوری کارروائی عمل میں لائی گئی، متعدد دکانداروں کو جرمانے عائد کیے گئے جبکہ بعض کو سخت وارننگ جاری کی گئی، انتظامیہ نے غیر معیاری اور ناقص اشیائے خوردونوش فروخت کرنے والوں کے خلاف بھی قانونی کارروائی کی ۔
ایڈیشنل اسسٹنٹ کمشنر اختر رسول کا کہنا تھا کہ رمضان المبارک میں منافع خوری، ذخیرہ اندوزی اور سرکاری نرخنامے کی خلاف ورزی کسی صورت برداشت نہیں کی جائے گی، اور عوام کو زیادہ سے زیادہ ریلیف فراہم کرنا ضلعی انتظامیہ کی اولین ترجیح ہے ۔
